ಅಮೆರಿಕಕ್ಕೆ ಹೊರಟಿದ್ದ ಮಹಿಳೆ ಬ್ಯಾಗ್​ನಲ್ಲಿ ಸ್ಯಾಟಲೈಟ್ ಫೋನ್ ಪತ್ತೆ, ಏನಿದು ?

ಬೆಂಗಳೂರಿನಿಂದ ಮುಂಬೈ ಮೂಲಕ ಅಮೆರಿಕಕ್ಕೆ ಹೊರಟಿದ್ದ ಮಹಿಳೆ ಹ್ಯಾಂಡ್​ ಬ್ಯಾಗನ್ನು ತಪಾಸಣೆ ಮಾಡಿದಾಗ ಸ್ಯಾಟಲೈಟ್​ ಫೋನ್​ ಪತ್ತೆಯಾಗಿದೆ. ಈ ಘಟನೆ ನಗರದ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನಡೆದಿದೆ.

ಜೆಟ್​ ಏರ್‌ವೇಸ್‌ ವಿಮಾನ ಸಂಖ್ಯೆ 9W488 ನಲ್ಲಿ ಹೊರಡಲು ಸಿದ್ಧವಾಗಿದ್ದ ಅಮೆರಿಕದ ಪ್ರಜೆ ಪರ್ಲ್​ ಎಂಜಾಲ್ ಮೆಕ್ಕಾನ್ಸ್​ ಎಂಬಾಕೆಯ ಬ್ಯಾಗ್​ನಲ್ಲಿ ಸ್ಯಾಟಲೈಟ್​ ಫೋನ್​ ಪತ್ತೆಯಾಗಿದೆ. ನಿನ್ನೆ ಸಂಜೆ 6 ಗಂಟೆ 10 ನಿಮಿಷದಲ್ಲಿ ಡಿಪಾರ್ಚರ್‌ಗೆ ಬಂದಾಗ ಘಟನೆ ಬೆಳಕಿಗೆ ಬಂದಿದೆ. ಈ ವೇಳೆ ಪತ್ತೆಯಾದ ಫೋನ್ ಬಗ್ಗೆ ಮಹಿಳೆ ಯಾವುದೇ ದಾಖಲಾತಿ ನೀಡಿಲ್ಲ. ಅಂದಹಾಗೆ ಭಾರತದಲ್ಲಿ ಸ್ಯಾಟಲೈಟ್​ ಫೋನ್​ ಬಳಕೆಗೆ ನಿಷೇಧ ಹೇರಲಾಗಿದೆ. ಹೀಗಾಗಿ CISF ಅಧಿಕಾರಿ​ ಎಂ ಎಸ್​ ಯಾದವ್ ಅವರಿಂದ KIAL ಪೊಲೀಸ್​ ಠಾಣೆಗೆ ದೂರು ದಾಖಲಾಗಿದ್ದು, ಇಂಡಿಯನ್ ವೈರ್​ಲೆಸ್​​ ಆ್ಯಕ್ಟ್,​​ ಇಂಡಿಯನ್ ಟೆಲಿಗ್ರಫಿ ಆ್ಯಕ್ಟ್​ ಅಡಿ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.